J4K

நேரம்: 35 நிமிடங்கள் [🔥]

ஒவ்வொரு கேள்வியையும் அதற்கான வேதாகம மேற்கோளுடன் பகிர்ந்து தொடங்குங்கள். சிறுவர்கள் தாங்களே வாசித்து, விவாதித்து, பதில்களை கண்டுபிடிக்க நேரம் ஒதுக்குங்கள். அவர்கள் கண்டுபிடித்தவற்றை பகிர்ந்த பிறகு, ஒவ்வொரு கேள்விக்கும் ஆசிரியர் சுருக்கமான குறிப்புகளுடன் முடிக்கலாம் — தேவன் படைப்பாளி என்பதும், படைப்பில் உள்ள ஒழுங்கும் நோக்கமும், வாழ்க்கையின் பெரிய கேள்விகளுக்கு வேதாகமம் எவ்வாறு பதில் அளிக்கிறது என்பதையும் அவர்கள் கண்டறிய உதவுங்கள்.

அமர்வை முடிக்கும்போது, ஆர்வத்தை உறுதி செய்யவும், விசுவாசத்தை ஊக்கப்படுத்தவும், இப்போது எல்லாவற்றையும் நாம் அறியவில்லை என்றாலும், தேவனை நம்புவதற்கு அவர் போதுமான அளவு வெளிப்படுத்தியுள்ளார் என்பதை சிறுவர்களுக்கு நினைவூட்டவும்.

Q1: எல்லாம் எவ்வாறு தொடங்கியது?

பிரபஞ்சம் தானாகவே உருவானதா, அல்லது தேவன் அதை திட்டமிட்டு படைத்தாரா?
குறிப்பு: ஆதியாகமம் 1:1, எபேசியர் 1:4

ஆசிரியர் குறிப்புகள்:
பூமி எவ்வாறு தொடங்கியது என்பதைக் குறித்து மதச்சார்பற்ற விஞ்ஞானிகள் பல கருத்துகளை முன்வைத்துள்ளனர். சிலர் பிக் பேங் (Big Bang) பற்றிப் பேசுகிறார்கள்; மற்றவர்கள் பரிணாம வளர்ச்சியே எல்லாவற்றையும் விளக்குகிறது என்றும், மனிதர்கள் குரங்குகளிலிருந்து வந்தவர்கள் என்றும் கூறுகிறார்கள். ஆனால் மதச்சார்பற்ற விஞ்ஞானிகளும் ஒரே ஒரு விஷயத்தில் ஒப்புக்கொள்கிறார்கள்—இதுவரை உள்ள எந்த விஞ்ஞான ஆதாரமும் ஆதியாகமம் 1-ல் கூறப்பட்ட படைப்புக் குறிப்பை மறுப்பதில்லை.

வேதாகமம் தெளிவாகச் சொல்கிறது: “ஆதியிலே தேவன் வானத்தையும் பூமியையும் சிருஷ்டித்தார்”.
படைப்பின் ஆதாரமான தேவனே, அது எவ்வாறு தொடங்கியது என்பதை நமக்குத் தெரிவிக்கிறார். படைப்பு சீரற்ற இரசாயன எதிர்வினைகளின் விளைவு அல்ல. தேவன் அனைத்தையும் திட்டமிட்டு, நோக்கத்தோடு படைத்தார். படைப்பைப் பற்றி அவர் கவனமாக சிந்தித்தார்—அதில் நீங்களும் அடங்குகிறீர்கள். உலகத்தோற்றத்துக்கு முன்னே தேவன் நம்மைத் தெரிந்துகொண்டார் என்று வேதாகமம் நமக்குச் சொல்லுகிறது.

---

Q2: ஆரம்பம் எப்படியிருந்தது?

பூமி இருட்டாக இருந்ததா அல்லது பிரகாசமாக இருந்ததா? அமைதியாக இருந்ததா அல்லது சத்தமாக இருந்ததா? அது காலியாக இருந்ததா அல்லது நிரம்பியிருந்ததா?
குறிப்பு: ஆதியாகமம் 1:1, 2

ஆசிரியர் குறிப்புகள்:
ஆரம்பம் அழகாக இல்லை என்று வேதாகமம் நமக்குச் சொல்கிறது. பூமி வடிவமற்றதாகவும், காலியாகவும், தண்ணீரால் மூடப்பட்டதாகவும் இருந்தது. வெளிச்சம் எதுவும் இல்லை—இருள் மட்டுமே இருந்தது. சில வேதாகம அறிஞர்கள், முதலில் ஒரு அழகான உலகம் இருந்ததாகவும், சாத்தான் தேவனுக்கு விரோதமாக கிளர்ச்சி செய்தபோது அது அழிந்துவிட்டதாகவும், பின்னர் அவன் பூமிக்கு தள்ளப்பட்டதாகவும் நம்புகிறார்கள். இந்தக் கருத்து Gap Theory (இடைவேளை கோட்பாடு) என அழைக்கப்படுகிறது; ஏனெனில் ஆதியாகமம் 1:1 மற்றும் 1:2 இடையே ஒரு இடைவெளி இருந்ததாக அவர்கள் கூறுகிறார்கள். மற்ற அறிஞர்கள் இதை ஏற்கவில்லை; அது உண்மையாக இருந்தால், தேவன் இவ்வளவு முக்கியமான தகவலை வேதாகமத்தில் விட்டுவிட மாட்டார் என்று அவர்கள் நம்புகிறார்கள். இந்தக் கருத்து பொதுவாக Young Earth Theory (இளம் பூமி கோட்பாடு) என அழைக்கப்படுகிறது.

எந்தக் கருத்து சரியானதாக இருந்தாலும், ஒன்று மட்டும் தெளிவாக உள்ளது: இன்று நாம் காணும் பூமி ஆரம்பத்தில் அழகாக இல்லை. அது காலியாகவும், பாழடைந்ததாகவும் இருந்தது. ஆனால் தேவன் அதை இன்று நாம் வாழும் அழகான உலகமாக மாற்றினார்.

---

Q3: டைனோசர்கள் உண்மையில் இருந்தனவா? வேதாகமம் அவற்றைப் பற்றிப் பேசுகிறதா?

குறிப்பு: யோபு 40:15–45; யோபு 41; சங்கீதம் 104:26

ஆசிரியர் குறிப்புகள்:
முதல் டைனோசர் உயிர்ச்சிதைவு (fossil) 1677ஆம் ஆண்டு இங்கிலாந்தில் ராபர்ட் ப்ளாட் (Robert Plot) என்பவரால் அடையாளம் காணப்பட்டது. அதற்கு பல ஆண்டுகள் பின்னர், “டைனோசர்” (Dinosaur) என்ற சொல் விஞ்ஞானி ரிச்சர்ட் ஓவென் (Richard Owen) அவர்களால் உருவாக்கப்பட்டது. இந்தச் சொல் கிரேக்க மொழியில் “பயமூட்டும் மிகப் பெரிய பல்லி” என்ற அர்த்தம் கொண்ட வார்த்தைகளில் இருந்து வந்தது. மனிதர்கள் டைனோசர்களை சமீப காலத்தில்தான் கண்டறிந்தனர் என்பதைக் காட்டுகிறது.

வேதாகமம் சுமார் 2,000 ஆண்டுகளுக்கு முன்பு எழுதப்பட்டது—“டைனோசர்” என்ற சொல் பயன்படுத்தப்படும் காலத்திற்கு மிகவும் முன்பே எழுதப்பட்டது. ஆகையால் வேதாகமத்தில் அந்தச் சொல் பயன்படுத்தப்படவில்லை என்பது ஆச்சரியமானது அல்ல. இருப்பினும், வேதாகமம் வலிமையானதும் பயமூட்டுவதுமான உயிரினங்களை விவரிக்கிறது.

பல வேதாகம அறிஞர்கள், இந்த உயிரினங்கள் டைனோசர்களாக இருக்கலாம் என்று நம்புகிறார்கள்:
பிகெமோத் (யோபு 40:15–45),
லிவியாதான் (யோபு 41; சங்கீதம் 104:26),
வலுசர்ப்பங்கள்/ டிராகன் (சங்கீதம் 74:13).

மீண்டும் ஒருமுறை, வேதாகமம் விஞ்ஞானத்துடன் முரண்படுவதில்லை என்பதை நாம் காண்கிறோம்.

---

Q4: லூசிஃபர் (சாத்தான்) தேவனால் படைக்கப்பட்டவரா? அவனுக்கு என்ன நடந்தது?

குறிப்பு: எசாயா 14:12; எசேக்கியேல் 28:13

ஆசிரியர் குறிப்புகள்:

ஆம், சாத்தானும் தேவனால் படைக்கப்பட்டவனே—நம்மைப் போலவே. ஆரம்பத்தில் அவன் தீயவனாக இல்லை. வேதாகமம் அவன் அழகானவனாக, ஒரு சிறப்பு நிலையைக் கொண்டவனாகவும் இருந்தான் என்று கூறுகிறது. ஆனால் ஒரு நாள், அகந்தை அவனது இருதயத்தை நிரப்பியது. அவன் தேவனைவிட உயர்ந்தவனாக ஆக விரும்பினான்.

உங்கள் பிரியாணி உங்களிடம், “இனிமேல் நான் உன்னை ஆளுவேன். நான் சொல்வதையெல்லாம் நீ கேட்க வேண்டும்” என்று சொன்னால் எப்படி இருக்கும்? அது ஒருபோதும் நடக்காது அல்லவா! இப்படி, தனது அகந்தையும் கலகமும் காரணமாக சாத்தான் கீழே வீழ்த்தப்பட்டான்.

சில வேதாகம அறிஞர்கள், இது டைனோசர்களின் அழிவுடன் தொடர்புடையதாக இருக்கலாம் என்று கூறுகிறார்கள். ஆனால் வேதாகமம் இதைப் பற்றி தெளிவாகக் கூறவில்லை.

---

கூடுதல் கேள்விகள் (Optional – பெரிய சிறுவர்களுக்காக)

Q6: தேவன் ஏன் படைப்பின் அறிவியலை வேதாகமத்தில் விளக்கவில்லை? ஏன் சமன்பாடுகளோ(equations) அல்லது சூத்திரங்களோ (formulas) இல்லை?

வேதாகமம் ஒரு அறிவியல் பாடநூல் அல்ல. அது தேவனின் அன்புக் கடிதமும், சிறந்த வாழ்க்கையை வாழ வழிகாட்டும் கையேடும் ஆகும். தேவன் இதை விஞ்ஞானிகளுக்காக மட்டுமே எழுதவில்லை.
வேதாகமம் சிக்கலான கணித சமன்பாடுகளும் இரசாயன சூத்திரங்களும் நிறைந்ததாக இருந்திருந்தால், நம்மில் பலருக்கு அதை புரிந்துகொள்ள முடியாது.
அதனால், அனைவரும் புரிந்துகொள்ளக்கூடிய எளிய முறையில் படைப்பை தேவன் விளக்கியுள்ளார்.
வேதாகமம் ஒவ்வொரு விபரத்தையும் சொல்லவில்லை என்றாலும், எந்த அறிவியல் கருத்துகள் சத்தியத்துடன் ஒத்துப்போகின்றன, எவை ஒத்துப்போகாது என்பதை அறியத் தேவையான குறிப்புகளை அது நமக்கு அளிக்கிறது.

---

Q7: தேவன் எங்கிருந்து வந்தார்? தேவனை யார் படைத்தார்?

டாக்டர் கெண்ட் ஹோவிந்த் (Dr. Kent Hovind) இதை அழகாக விளக்குகிறார்:

“வேதாகமத்தில் சொல்லப்படும் தேவன் காலம் (Time), இடம் (Space), பொருள் (Matter) ஆகியவற்றால் பாதிக்கப்படுபவர் அல்ல. அவர் இவற்றால் பாதிக்கப்படுபவராக இருந்தால், அவர் தேவன் அல்ல.
காலம், இடம், பொருள் — இம்மூன்றையும் நாம் ஒரு தொடர்ச்சி (continuum) என்று அழைக்கிறோம்; அவை அனைத்தும் ஒரே நேரத்தில் தோன்றியிருக்க வேண்டும்.

இடமில்லாமல் பொருள் இருந்தால், அதை எங்கு வைப்பீர்கள்?
இடமும் பொருளும் இருந்தும் காலம் இல்லையென்றால், அதை எப்போது வைப்பீர்கள்?

காலம், இடம், பொருள் — இவை தனித்தனியாக இருக்க முடியாது; அவை ஒரே நேரத்தில் தோன்ற வேண்டும்.

வேதாகமம் இதற்குப் பதிலை 10 வார்த்தைகளில் கூறுகிறது:
“ஆதியிலே (காலம்), தேவன் வானத்தையும் (இடம்) பூமியையும் (பொருள்) சிருஷ்டித்தார்.”

காலத்திற்கு கடந்தகாலம், நிகழ்காலம், எதிர்காலம் உள்ளது.
இடத்திற்கு நீளம், அகலம், உயரம் உள்ளது.
பொருளுக்கு திடம், திரவம், வாயு உள்ளது.

இவற்றையெல்லாம் படைத்த தேவன், இவைகளுக்குப் புறம்பாக இருக்க வேண்டும்.
அவர் காலத்தால் கட்டுப்படுத்தப்பட்டவராக இருந்தால், அவர் தேவன் அல்ல.

உதாரணமாக, ஒரு மொபைல் போனை உருவாக்கியவர், அந்த மொபைல் போனுக்குள் இருந்து திரையில் எண்களை மாற்றிக்கொண்டிருப்பதில்லை.
அதேபோல், பிரபஞ்சத்தை படைத்த தேவன், பிரபஞ்சத்திற்குள் இல்லை;
அவர் அதற்கு மேலானவர், அதற்குப் புறம்பானவர், அதனால் பாதிக்கப்படாதவர்.

“தேவன் எங்கிருந்து வந்தார்?” என்ற கேள்வி, தேவன் ஒரு வரையறுக்கப்பட்டவர் என்ற தவறான கருத்துகள் இருந்து வருகிறது.
நாம் தேவனை முழுமையாக புரிந்து கொள்ள முடிந்திருந்தால், அவர் ஆராதிக்கத் தகுதியானவராக இருக்க மாட்டார்.”

---

இறுதி முடிவு

இன்றைய அனைத்து விவாதங்களும் ஒரு பெரிய கேள்விக்கே நம்மை அழைத்து செல்கின்றன: தேவன் ஏன் இந்த உலகத்தை படைத்தார்? இதை வரும் அமர்வுகளில் தொடர்ந்து நாம் ஆராய்வோம்.

இப்போதைக்கு நாம் எடுத்துக்கொள்ள வேண்டிய முக்கியமான கருத்து இதுதான்: படைப்பின் ஒவ்வொரு செயல்முறையையும் வேதாகமம் விரிவாக விளக்காவிட்டாலும், தேவனை நம்புவதற்கு போதுமானதை அவர் நமக்குத் வெளிப்படுத்தியுள்ளார். தேவன் இல்லை என்பதை அறிவியல் நிரூபிக்க முடியவில்லை. உண்மையில், பல கிறிஸ்தவ அறிவியலாளர்கள், தேவன் செய்தவற்றை அறிவியலின் மூலம் மேலும் மேலும் கண்டுபிடித்து வருகின்றனர்.

இந்த அமர்வு, உங்கள் விசுவாசத்திலும், தேவனை பற்றிய ஆர்வத்திலும் வளர உங்களை ஊக்குவித்திருக்க வேண்டும் என்பதே எங்களின் நம்பிக்கை.